ಎಣ್ಣೆ ತೀರುವವರೆಗೆ
ಬತ್ತಿ ಆರುವವರೆಗೆ
ಕತ್ತಲ ಲಹರಿ ಸೀಳುತ್ತ
ಬೆಳಕ ಮಳೆಯ ಚೆಲ್ಲುತ್ತ...
ದೀಪ ಉರಿಯುತ್ತದೆ -
ಇಟ್ಟಲ್ಲಿಯೇ ಇಟ್ಟಂತೆಯೇ
ಯಾರ ಹಂಗಿಲ್ಲದಂತೆ
ಬೇಸರದ ಹೊದಿಕೆ ಸರಿಸುತ್ತ
ಖುಷಿಯಲೆಯ ಅಪ್ಪಳಿಸುತ...
ದೀಪ ಉರಿಯುತ್ತದೆ -
ಹಣತೆಯ ಅಪ್ಪಿ, ಬತ್ತಿಗೆ
ತೈಲಕ್ಕೆ ಜೀವ ನೀಡುತ್ತ
ಹೊಸ ಲೋಕಕೆ ಬಾಗಿಲಾಗಿ
ನೆಮ್ಮದಿಯ ಮೆರುಗು ನೀಡುತ್ತ...
ಕೊನೆಗೊಮ್ಮೆ ದೀಪವಾರುತ್ತದೆ -
ಕಾಲಚಕ್ರದ ಗತಿಗೆ ತಲೆಬಾಗಿ
ತಂಗಾಳಿಯ ನಡುವೆ ಇಲ್ಲವಾಗಿ
ಜಗದ ಸಂತೆಯಿಂದ ದೂರವಾಗಿ
ಸದ್ದಿಲ್ಲದೇ ಸ್ವರ್ಗ ಸೇರುವ ಆತ್ಮವಾಗಿ...!!
- R.R.B.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ