ಶೀರ್ಷಿಕೆ ಇಲ್ಲದ ಸಾಲುಗಳು

ಮುಂಜಾನೆಯ ಈ ಸವಿ ಸಮಯಕೆ 

ಹೊಂಬಿಸಿಲಿನ ಸಿಹಿ ಸ್ಪರ್ಷ ಇಳೆಗೆ 

ಆಲಂಗಿಸೋ ತಂಬೆಲರ ಮೌನರಾಗಕೆ 

ತಲೆದೂಗೋ ಆನಂದ ಚಿಗುರೆಲೆಗೆ... 

ಎತ್ತರಕೆ ಬೆಳೆದುನಿಂತ ಕಲ್ಪವೃಕ್ಷಕೋ 

ನೀಲಾಕಾಶವ ಚುಂಬಿಸುವ ಬಯಕೆ 

ಗಿಡಗಳ ತಬ್ಬಿಕೊಂಡ ಮುಳ್ಳುಬೇಲಿಗೋ 

ಆಗಾಗ ಬರುವ ಯಜಮಾನನದೇ ಸ್ಮರಿಕೆ... 

ಗದ್ದೆಯಂಚಲಿನ್ನೂ ನಿದ್ದೆಮಂಪರಿನ ರಸ್ತೆ 

ಕಾಲುದಾರಿಯ ಪಯಣದಲಿಹ ಯಾತ್ರಿಕ 

ತಿಳಿಸದೇ ಸಂಗಾತಿಯಾಗಿವೆ ಹೆಜ್ಜೆ ಸದ್ದು 

ಇನ್ನೆಲ್ಲೋ ಸದ್ದಿಲ್ಲದೆ ಕಾಯುತಿದೆ ನೆರಳು...  

ಹಸಿರಸೀರೆಯ ಸೆರಗಿಗೆ ಸೊಬಗ ಚಿತ್ತಾರ 

ಮನದ ಕಡಲಲಿ ಈಗೀಗ ಬರೀ ಉಬ್ಬರ... 

ಬೀಸೋ ಗಾಳಿಯಲೆಗೆ ಹಾಯಿ ಬಿಸಿಲಕೋಲು 

ಗೊತ್ತಾಗದಂತೆ ಪ್ರಸವಿಸಿದ ಭಾವಗಳು ಸಾಲು ಸಾಲು...

- R.R. B.