ಭಾವಗಳ ಪ್ರಸವ ನಿಂತಿದೆಯೆಂದು
ಪಾರ್ಕಲ್ಲಿ ಕುಳಿತು ನಿಟ್ಟುಸಿರು ಬಿಟ್ಟ...
ಕೋಟ್ಯಂತರ ಕಥೆಗಳ ಅರಗಿಸಿಕೊಂಡ
ಪ್ರಾಚೀನ ಕಲ್ಲುಬೆಂಚೊಂದು ಸದ್ದಾಗದಂತೆ
ಕಥೆಗಾರನ ನೋಡಿ ನಕ್ಕಿತ್ತಂತೆ...ನಿಜವೇ?
********************************
ಬಹುಶಃ ಅಂದಿನ ಇಂದಿನ ನಡುವೆ
ಹೆಚ್ಚೇನೂ ಗಹನವಾದ ವ್ಯತ್ಯಾಸವಿಲ್ಲ
ಅದೇ ಪಾರ್ಕು, ಅದೇ ಚಂದದ
ಕಲ್ಲುಬೆಂಚು
ಮತ್ತದೇ ಸ್ವಲ್ಪವೂ
ಬದಲಾಗದ ಅವನು...
ಆಗ - ಅವಳೊಂದಿಗಿನ ಭವಿತವ್ಯದ ಕನಸು
ಈಗ - ಮಣ್ಣಾದ ಅವಳ ಕೊನೆಕ್ಷಣಗಳ ನೆನಪು...
********************************
ಬೆಂಚಿನ ಮೇಲೆ ಕುಳಿತ ಒಬ್ಬಂಟಿಯೊಬ್ಬ
ಗಾಢವಾಗಿ ಜೀವನದ ಸತ್ಯ ಹುಡುಕುತ್ತಿದ್ದ
ಸಂಬಂಧಗಳೆಲ್ಲಾ ತಾತ್ಕಾಲಿಕ ಮಾತ್ರ ಎಂದು...
ಎದ್ದು ಹೋದವರನ್ನು ಲೆಕ್ಕವಿಡಲಾಗದ
ಆ ಕಲ್ಲುಬೆಂಚಿನ ಅಂಚಲ್ಲೊಂದು ಕಿರುನಗು...
- R. R. B.
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ