ನೆನಪಿನಂಗಳದಿಂದ..

ಗತಕಾಲದ ಆ ದಿನಗಳು 

ಕಳೆದ ಮಧುರ ಕ್ಷಣಗಳು 

ಬರೀ ಪದಗಳಲಿ ಹೇಳಲಾದೀತೆ? 

ಭಾವಗಳ ಅಭಿವ್ಯಕ್ತಗೊಳಿಸಲಾದೀತೆ?.. 

ರಸ್ತೆಯ ತುಂಬೆಲ್ಲಾ ಓಡಾಡಿ 

ಹುಣಸೆಕಾಯಿಗಾಗಿ ಕಿತ್ತಾಡಿ 

ಶಾಲೆ ಬಿಡುವುದೇ ಕಾಯುತ್ತ 

ಮನದಿ ಮಂಡಿಗೆ ತಿನ್ನುತ್ತಿದ್ದ ಕಾಲ..... 

ತರಗತಿಯನ್ನೇ ವಿಭಾಗಿಸಿ 

ನಮಗಿಷ್ಟು - ನಿಮಗಿಷ್ಟೆಂದು 

ಶಿಕ್ಷಕರ ಮುಂದೇ ಕಚ್ಚಾಡಿ 

ಬೈಸಿಕೊಂಡೂ, ನಗುತ್ತಿದ್ದ ಸಮಯ...

ನಾವೇ ಸಾಧಕರು ಎಂಬಂತೆ 

ಪಾಥೇ೯ನಿಯಂ ಗಿಡದ ಕೋಲು ತಂದು 

ಇಂಗ್ಲೀಷ್ ನ ಪ್ರಶ್ನೆಗಳಿಗೆ ಉತ್ತರಿಸದೇ 

ತಂದ ಕೋಲಿಂದ ಏಟು ತಿಂದ ಘಳಿಗೆ..... 

ಪ್ರತಿಭಾ ಕಾರಂಜಿ ನೆಪ ಹೇಳಿ 

ತರಗತಿಗಳ ತಪ್ಪಿಸುತ್ತ 

ಆಟಕೆ ಬಿಡಿ ಸರ್.. ಎಂದು 

 ಗುರುಗಳ ಒತ್ತಾಯಿಸುತ್ತಿದ್ದ ಅವಧಿ...

ಹಿರಿಯರು ಕೊಟ್ಟ ಹಣ ಕೂಡಿಡುತ್ತ 

ಜಾತ್ರೆಯ ಬರುವಿಕೆಗಾಗಿ ಕಾಯುತ್ತ 

ಏನು ಕೊಳ್ಳೋಣವೆಂದು ಆಲೋಚಿಸುತ್ತ 

ಕನಸು ಕಾಣುತ್ತಿದ್ದ ದಿನಗಳು....

ಕಳೆದ ಒಂದೊಂದು ರಸನಿಮಿಷ 

ತನ್ನೊಳಗಡಗಿಸಿಕೊಂಡಿತ್ತು ಹರುಷ 

ಬೇಕಾಗಿದೆ ಅಂತಹ ದಿನಗಳು 

ಮುಗ್ಧತೆಯೇ ತುಂಬಿಹ ಮನಗಳು.....

 - R. R. B.